وصفات البلاد للفراخ

موضوع: وصفات البلاد للفراخ 16/2/2011, 3:34 pm

جيبالكو وصفات للفراخ من كل مطابخ العالم يارب تعجبكم

ومتنسوش الردود

الفراخ على الطريقة الإيطالية
المقادير:
8 قطع أوراك فراخ
بصلة متوسطة مقطعة شرائح
ثمرة فلفل أحمر مقطعة شرائح
ملعقة كبيرة زعتر فريش
1/ 2 كيلو طماطم مقطّعة
1/ 2 كوب شوربة فراخ
1/ 2 كوب زيتون أسود
عصير برتقالة صغيرة
بشر برتقالة صغيرة
2 فص ثوم مفرومين
ملح وفلفل أسود
2 ملعقة زيت

الطريقة:

1- أول حاجة شوّحي الفراخ من غير زيت على جريل أو طاسة تيفال علشان الفراخ ماتلزقش فيها.

2- قلّبي الفراخ على الجانبين لحد ما لونها يبقى ذهبي، وبعدين حطّيها في صينية أو قالب زجاجي.

3- حطّي زيت في الطاسة مكان الفراخ وشوّحي فيه البصل والثوم والفلفل الأحمر لمدة 3 : 4 دقائق وبعدين حطّيهم في القالب مع الفراخ.

4- بعد كده ضيفي عليهم بشر البرتقال والعصير وشوربة الفراخ والطماطم وقلّبيهم وحطّيهم على النار.

5- سيبى القالب على النار لحد ما الخليط يغلي وبعدين غطيه وسيبيه على نار هادية لمدة ساعة وقلبيه من وقت للتانى.

6- بعد كده ضيفي الزعتر المفروم والزيتون والملح والفلفل الأسود، وعند التقديم زيّنيه الطبق ببشر البرتقال.. وبالهنا والشفا.

موضوع: رد: وصفات البلاد للفراخ 16/2/2011, 3:35 pm

الفراخ على الطريقة اليابانية
المقادير:
12 قطعة أوراك فراخ
3/ 4 كوب خل بلسميك
3 3/ 4 ملعقة كبيرة سكر
1/ 2 كوب صويا صوص
1 1/2 كوب ميه
1 1/ 2 فص ثوم
1 1/ 2 فلفل حار

الطريقة:

1- حطّي كل المكونات ما عدا الفراخ في حلة على نار عالية وسيبيهم لحد ما يغلوا.

2- قللي درجة الحرارة لمدة 20 دقيقة، وسيبي الخليط يتسوي على نار هادية، مع مراعاة إنك تشيلي أي ترسبات ممكن تظهر على السطح، بعد كده زودي النار وحطي الأوراك في الصوص واطبخيها لحد ما السائل يبقى لزج.

3- رصّي الأوراك في طبق التقديم وصبي عليهم الصوص بعد ما تصفيه من بواقي الثوم والفلفل.. وبالهنا والشف

موضوع: رد: وصفات البلاد للفراخ 16/2/2011, 3:40 pm

فراخ بالزبدة على الطريقة الهندية
المقادير:
1/ 2 كيلو فراخ مخلية
ورق لاورا
ملعقة نشا
بصلة مفرومة
1/ 4 كوب زبادي
1/ 2 كوب كريمة
1/ 4 ملعقة شطة
ملح وفلفل أسود
2 ملعقة كبيرة زبدة
2 ملعقة كبيرة زيت
كوب صلصة طماطم
ملعقة صغيرة كمون
ملعقة صغيرة بابريكا
1/ 2 ملعقة زنجبيل مفروم
2 ملعقة صغيرة عصير ليمون
1/ 2 ملعقة كبيرة ثوم مفروم
الطريقة:

1- حطّي شوية زيت في طاسة كبيرة، وشوّحي فيها البصل لحد ما يذبل ويبقى لونه شفاف.

2- بعد كده حطّي الزبدة، وعصير الليمون، والثوم والزنجبيل المفرومين، والبابريكا، والكمون، وورق اللاورا، وقلّبيهم شوية على النار.

3- بعد كده حطّي صلصة الطماطم وقلّبي الخليط وسيبيه على النار لمدة 2 : 3 دقائق وبعدين حطّي الكريمة والزبادي وقلّبيهم كويس أوي.

4- قلّلي النار وسيبي الصوص على نار هادية لمدة 10 دقائق، وتبّليه بالملح والفلفل الأسود والشطة وبعدين ارفعيه من على النار.

5- بعد كده هاتي طاسة وسخّني فيها شوية زيت، وقطّعي الفراخ قطع صغيرة وشوّحيها في الزيت شوية لحد ما لونها يبقى ذهبي، وبعد كده قلّلي النار وبعدين تبّلي الفراخ بالملح والفلفل والشطة.

6- بعد كدة خدي 1/ 3 كوب من الصوص اللي جهزتيه، وحطّيه على الفراخ وسيبيهم على النار لمدة 5 دقائق لحد ما كميته تقل شوية، وبعد كده صبّي باقي الصوص على الفراخ.

7- اخلطى ملعقة النشا مع ميه وقلّبيهم كويس وحطّيهم على الفراخ، وسيبيهم على النار لمدة 5 : 10 دقائق أو لحد ما الصوص يبقى سميك.. وبالهنا والشفا.

موضوع: رد: وصفات البلاد للفراخ 16/2/2011, 6:01 pm

انتى مجربها يا روان ولا على العموم انا هجربها

موضوع: رد: وصفات البلاد للفراخ 16/2/2011, 10:24 pm

انا مجربه الاولى بس

ايه رايكم فى المنتدى ؟